បុរសម្នាក់ដែលជាមុខសញ្ញាប្រើប្រាស់គ្រឿងញៀន បានប្រើឥទ្ធិពលនៃសារធាតុញៀនរហូតដល់ហ៊ានលើកកាំបិតបុ័ងតោ ដេញកាប់ទៅលើឪពុកម្តាយបង្កើតរបស់ខ្លួនឯង។ សំណាងល្អ កម្លាំងសមត្ថកិច្ចនគរបាលស្រុកសំរោង ខេត្តតាកែវ បានចុះទៅបង្ក្រាប និងឃាត់ខ្លួនជនសង្ស័យបានទាន់ពេលវេលា។ ហេតុការណ៍ដ៏អសីលធម៌នេះបានកើតឡើងនៅថ្ងៃទី១៧ ខែតុលា ឆ្នាំ២០២៥ នៅចំណុចភូមិអារោង ឃុំស្លា ស្រុកសំរោង ខេត្តតាកែវ។
យោងតាមរបាយការណ៍របស់សមត្ថកិច្ចបានឲ្យដឹងថា ករណីនេះបានកើតឡើងដោយសារអំណាចនិងឥទ្ធិពលនៃគ្រឿងញៀន ដែលបានធ្វើឲ្យជនសង្ស័យមានការបំផ្លិចបំផ្លាញទៅលើខ្លួនឯង អ្នកដទៃ និងក្រុមគ្រួសារ ក៏ដូចជាសង្គមជាតិផងដែរ។
កម្លាំងនគរបាលព្រហ្មទណ្ឌនៃអធិការដ្ឋាននគរបាលស្រុកសំរោង បានសហការជាមួយកម្លាំងប៉ុស្តិ៍នគរបាលរដ្ឋបាលឃុំស្លា ចុះទៅបង្ក្រាបជនសង្ស័យដែលកំពុងប្រើកាំបិតបុ័ងតោដេញកាប់ឪពុកម្តាយរបស់ខ្លួន។ សមត្ថកិច្ចបានឃាត់ខ្លួនជនសង្ស័យបានភ្លាមៗ ដើម្បីបញ្ចៀសគ្រោះថ្នាក់ដែលគំរាមកំហែងដល់អាយុជីវិតឪពុកម្តាយរបស់ជនសង្ស័យ។



