(ស្វាយរៀង)៖ លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង បានបញ្ជាឲ្យដកបញ្ឈរជើងនាយប៉ុស្ដិ៍នគរបាលរដ្ឋបាលឃុំព្រែកតាអី ស្រុកស្វាយទាប ខេត្តស្វាយរៀង ក្រោយប្រើប្រាស់ពាក្យសម្ដីមិនសមរម្យ លើពលរដ្ឋដែលមកប្ដឹងករណីចោរលួចម៉ូតូ.!។
ថ្លែងប្រាប់អ្នកសារព័ត៌មាន នៅព្រឹកថ្ងៃទី១៦ ខែវិច្ឆិកា ឆ្នាំ២០២៥ លោក ពេជ្រ វីរៈ បញ្ជាក់ថា ករណីលោកអនុសេនីយ៍ឯក សុខ សំណាង នាយប៉ុស្ដិ៍នគរបាលរដ្ឋបាលឃុំព្រែកតាអី ។
ដែលប្រើប្រាស់ពាក្យសម្ដីមិនសមរម្យលើប្រជាពលរដ្ឋនោះ លោកបានបញ្ជាឲ្យដកបញ្ឈរជើង ហើយកំណត់ឲ្យទៅបង្ហាញមុខនៅផែនធនធានមនុស្ស នៃស្នងការដ្ឋាននគរបាលខេត្ត។
ការដកបញ្ឈរជើង នៅពេលនេះ បន្ទាប់ពីល្បីពេញបណ្ដាញសង្គមពាក់ព័ន្ធលោក សុខ សំណាង នាយប៉ុស្ដិ៍នគរបាលរដ្ឋបាលឃុំព្រែកតាអី ប្រើប្រាស់សម្ដីមិនសមរម្យ មកលើស្ដ្រីម្នាក់ ដែលទៅប្ដឹងករណីចោរលួចម៉ូតូ៕
