នៅទីបំផុត! មេបញ្ជាការកងរាជអាវុធហត្ថខេត្តកំពង់ធំ បានហៅលោកវរសេនីយ៍ឯក យី សំអូន មេបញ្ជាការរងកងរាជអាវុធហត្ថខេត្តកំពង់ធំ ដែលបានបង្កគ្រោះថ្នាក់ចរាចរណ៍ឱ្យចូលបំភ្លឺដោះស្រាយតាមផ្លូវច្បាប់ និងអនុវត្តបទវិន័យកងទ័ព

អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី បានបញ្ជាក់នៅថ្ងៃទី១៥ ខែកញ្ញា ឆ្នាំ២០២៦នេះថា កងរាជអាវុធហត្ថបានឃើញព័ត៌មានបង្ហោះតាមបណ្ដាញព័ត៌មានសង្គម ពាក់ព័ន្ធនាយទាហាននៃកងរាជអាវុធហត្ថខេត្តកំពង់ធំ ដែលបានបង្កគ្រោះចរាចរណ៍ កាលពីយប់ថ្ងៃទី១៤ ខែកញ្ញា នេះ។ អ្នកនាំពាក្យកងរាជអាវុធហត្ថលើផ្ទៃប្រទេស សូមគោរពជម្រាបជូនសាធារណជន និងអ្នកសារព័ត៌មានមេត្តាជ្រាបថា លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ បានហៅលោកវរសេនីយ៍ឯក យី សំអូន មេបញ្ជាការរងកងរាជអាវុធហត្ថខេត្តកំពង់ធំ ដែលបានបង្កគ្រោះថ្នាក់ចរាចរណ៍ឱ្យចូលបំភ្លឺដោះស្រាយតាមផ្លូវច្បាប់ និងអនុវត្តបទវិន័យកងទ័ព។ បើតាមអ្នកនោះពាក្យកងរាជអាវុធហត្ថលើផ្ទៃប្រទេស នៅខណៈនេះ លោកវរសេនីយ៍ឯក យី សំអូន បាននិងកំពុងនៅស្នងការដ្ឋាននគរបាលរាជធានីភ្នំពេញ។ សូមជម្រាបថាវេលាម៉ោងប្រមាណ១១យប់​ ថ្ងៃទី១៤ខែកញ្ញា​ ឆ្នាំ​២០២៦ មានហេតុការណ៍គ្រោះថ្នាក់ចរាចរណ៍ នៅលេីផ្លូវសហព័ន្ធរុស្សុី​ សង្កាត់ទឹកថ្លា​ ខណ្ឌសែនសុខ​ រាជធានីភ្នំពេញ​។ បើតាមប្រភពព័ត៌មានបុរសបើករថយន្តស៊េរីទំនេីប​ម៉ាក FORD RANGER ពាក់ផ្លាកលេខខេមរភូមិន្ទ​.09-2-3907 បើកបរក្នុងល្បឿនលឿនបុករះរថយន្ត២គ្រឿងនិងម៉ូតូ១គ្រឿងបណ្ដាលឲ្យមនុស្សម្នាក់រងរបួសបញ្ជូនទៅមន្ទីពេទ្យ​។ អ្នកបើករថយន្តបង្កហេតុត្រូវបានគេស្គាល់ថា វរសេនីយ៍ឯក យី សំអូន មេបញ្ជាការរងកងរាជអាវុធហត្ថខេត្តកំពង់ធំ ដោយបើកបរសង្ស័យក្នុងស្ថានភាពស្រវឹងស្រា៕