លោកឃឹម សំភារ បញ្ជាឲ្យក្រុមការងារ ចុះពិនិត្យមើលករណី លួចសាងសង់សំណង់រឹងមាំ ចូលដីចំណីទន្លេបាសាក់

(កណ្ដាល)៖ លោកឃឹម សំភារ អភិបាលក្រុងតាខ្មៅ បានបញ្ជាឲ្យក្រុមការងារចុះពិនិត្យមើលទីតាំងមួយកន្លែងដែលកំពុងលួចសាងសង់សំណង់គ្រឹះជើងតាងរឹងមាំ ចូលដីចំណីទន្លេបាសាក់។សូមជម្រាបថា ទីតាំងមួយនេះស្ថិតនៅភូមិកោះគ ឃុំរកាខ្ពស់ ក្រុងតាខ្មៅ ខេត្តកណ្ដាល។ បើតាមការឲ្យដឹងពីលោកអភិបាលក្រុងតាខ្មៅ នៅថ្ងៃទី ១៥ ខែមិថុនា ឆ្នាំ ២០២៦នេះថា ក្រុមការងារនឹងចុះទៅពិនិត្យមើលនៅស្អែកនេះ ក្រោយប្រជាពលរដ្ឋ បានធ្វើសេចក្ដីរាយការណ៍ ចូលគ្រុបប្រជាជនខេត្តកណ្ដាល ដើម្បីសិក្សាមើលទៅលើភាពជាក់ស្ដែង ព្រោះសំណង់រឹងមាំនេះពុំបានសុំច្បាប់នោះទេ ។ ទោះយ៉ាងណាលោកអភិបាលក្រុងអំពាវនាវពលរដ្ឋទាំងអស់ដែលមានបំណងសាងសង់សំណង់រឹងផ្សេងៗ ត្រូវសុំច្បាប់ឲ្យបានត្រឹមត្រូវ ហើយកុំរំលោភយកដីចំណីទន្លេ ឬដីចំណីផ្លូវសាធារណៈ។ គួររម្លឹកថា លោក គួច ចំរើន អភិបាលខេត្តកណ្ដាល បានបញ្ជាឲ្យមានការរុះរើរាល់សំណង់ទាំងអស់ដែលសាងសង់រំលោភចូលដីសាធារណរបស់រដ្ឋ ហើយរដ្ឋបាលក្រុងតាខ្មៅបាននិងកំពុងអនុវត្តន៍យ៉ាងសកម្មទៅលើលាររំលោភយកដីសាធារណៈមកធ្វើអាជីវកម្ម ។ ដោយម្ចាស់សំណង់ជាប់មាត់ទន្លេបែជាឆ្លៀតឱកាសលួចសាងសង់សំណង់រឹងមាំចូលដីចំណីទន្លេបាសាក់ទៅវិញដែលផ្ទុយពីគោលបំណងរៀបចំក្រុងរបស់រដ្ឋបាលខេត្តកណ្ដាល ៕ ប្រភពព័ត៌មានពី គេហទំព័រ សាន់ដេ